Фәкыйрьлек

Иң зур фәкыйрьлек –

ул күңел фәкыйрьлеге.
Тереза Ана

Матди байлыгым юк минем бер дә,

Шөкер, фәкыйрь түгел йөрәгем.

Ходаемны һәрчак зекер кылам,

Биргән өчен иң-иң кирәген.
Күпме изге ният күңелемдә,

Мәрхәмәтлек, шәфкать, игелек...

Тик хөсетлек, көнчелек юк миндә,

Ник яшәргә җаның игелеп?!
Җир һәм Күкләр – бөтен җиһан сыйган

Йөрәгемә шушы кечкенә.

Ләкин анда хәрәм, явызлыкка

Урын булмас, булмас һич кенә!
Мал табам дип дөнья кумадым мин,

Рухи байлык булды җыйганым.

Күңел фәкыйрьлеген күтәралмам –

Шул булмасын иде җуйганым! 

ИЛҺАМ НОГМАН

"КУ" 10, 2023

Фото: unsplash