«Ерагайды таулар...»

«Ерагайды таулар...»,

Авыр гына сулап,

Шулай диде бүген

Туксан яшьлек әби.

«Яшьрәк чагым булса,

Көнгә ничә урап

Төшәр идем икән?..

Җиләк пешә мәмрәп...

Мәтрүшкәләр үсә...

Түзәр идеммени?! –

Таулар ерак хәзер...»
Мин дә карыйм тауга.

Төшәрмен күк әле

Әллә ничә урап –

Таулар якын гына.

Мәтрүшкәләр, җиләк...

Гөмбә җыяр вакыт...

Ничек түзмәк кирәк –

Кул сузымы ара!

...Сискәнепләр киттем:

Якын араларны

ерагайта барып,

миңа насыйп еллар

Тауга менеп бара... 

"КУ" 03, 2024

Фото: unsplash