Чит калада (шигъри эссе)
Тиздән... тиздән бу калада дивана булып бетәм...
Чит калада йөреп ятам:
Урамнар – матур, иркен.
Тик... беркемне белмим монда,
Мине дә белми беркем.
Таныш юк, иптәш юк, дус юк,
Дошман да юк – күңелсез:
Тормыш монда минем өчен
Давылсыз... Яңгыр-җилсез...
Сагынып көткәне дә – юк,
Юк җанга тиюче дә.
Юк...
Юк тешләр кайраучы да,
Гайбәтләр өюче дә...
Күпме эшем калды... Монда
Бер эш юк ике кулга.
(«Выговор» алырга булган –
Чыкмаска булган юлга...)
Кояшы да башкачарак,
Ае да башкачарак.
Башкачарак... Башкачарак –
Һичнәрсә юк.
Юк һичнәрсә
Стәрлетамакчарак.
Сулар һавасы бүтән бит,
Эчәр сулары бүтән.
Тиздән... тиздән бу калада
Дивана булып бетәм...
Эх! Самолёт таныш миңа
Һавада юллар салган:
Стәрледә аңа –
Аңа! –
Бар куллар болгап калган.
Канатыңа ал, самолёт,
(Калсам – югалам монда).
«Мөһим командировкада
Шигырьләр язып йөргән...» дип,
«Выговор» бирсеннәр әйдә
Стәрлетамагымда...
"КУ" 1, 2020
Фото: "Казан утлары" архивыннан
Теги: поэзия
Иң мөһим һәм кызыклы язмаларны Татмедиа Telegram-каналындаукыгыз
Комментарии
0
0
Һәркемгә дә якын Казан, ник ул аңа чит микән? .............Калсам, әгәр, ди, Казанда, дивана булып бетәм. .............. ...Хәтта суы үтми, ди ул, Казанның, тамагымнан, ............Кайтсам башны да тыкмыйм, ди, Стәрлетамагымнан. ............ ...Рәхмәтулла ник ошатмый, микән Казан каласын? ................Юкса Казан үзенә тарта читтән татар баласын. ............... ...Монда миңа күңелсез, ди, сагындырды, бик түтәң, ..............Кулын селтәп кайтып киткән, килмим, дип монда бүтән... ............. ... Сәйлән
0
0