Бүген гүя үлеп терелдем мин...

Бүген гүя үлеп терелдем мин:
Гасырга тиң озын төн аша,
Саташулы төшләр эргәсеннән
Төсе качкан өнгә тоташам.

Күз алдымнан үтә мең күренеш,
Мең яңалык йота карашым.
Илдән – илгә, телдән телгә күчеп,
Өйдән өйгә йөри кара шом.
Дөнья күген караңгылык баскан,
Тыпырчына зәгыйфь яктылык.
Көзге көннең нурсыз йөзләрендә
Кайчан кояш калкыр – яктырып?
...Саташулы төшләр эргәсеннән
Өнгә кайтып кердем төн аша:
Кичәгемне бүгенемә ялгап,
Мин иртәгәм белән тоташам.

"КУ" 02, 2021

Фото: pixabay