Бер язасым килә...

Бер язасым килә...
барысын бәйнә-бәйнә сөйләп.
Языласы сүзләремне
күңелемнән йөрим көйләп.
Бушанасым килә сөйләп
бу тормышның ваклыкларын.
(Ә югыйсә син өйрәттең
һәрнәрсәдә хаклык барын!)
Бер сөйлисем килә...
авыр, «рәхәт» хәлләремне,
күңел яшен түккән чакта
мең елмайган мәлләремне.
Берәр кайчан, көчем җыеп,
белмим... сиңа сөйләрменме
еллар буе җыеп килгән
үзем белгән хәлләремне…

«КУ» 07, 2024

Фото: unsplash