Алмагачлар

Агачларның кыз чаклары,
Сылулар, бер дигәннәр!
Алмагачлар кемузардан
Туй күлмәге кигәннәр.
Күп тә узмас көмән-көмән
Алмага төйнәлерләр.
Җилдән алмага узган дип
Кемнәрдер сөйләнерләр.
Ак күлмәкләр алышыныр
Яшькелт халатлар белән.
Үзләре дә килешерләр
Мондый халәтләр белән.
Җимешләре дә өлгереп
Коелыр берәм-берәм.
Саргаеп беткән халатны
Тарткалар давыл, буран.
Ачы җилләр, зәһәр суык...
Ботакларын иярләр.
Алмагачлар кемузардан
Ап-ак кәфен киярләр...

"КУ" 06, 2024

Фото: unsplash