Билгесез солдат кабере янында

Ул һаман да әле билгесез бер
Юкка чыккан солдат, исемсез...
Гади солдат... Аны инде күптән
Беркем көтми... Тик ул үлемсез.
Аны көтми инде кәләше дә,
Ул саклаган ил дә күптән юк.

Аңа аткан ядрә һаман оча,
Кемгә барып тияр, белгән юк.
Ул чактагы янгын әле дөрли,
Инде ерак калган арасы...
Медальонның язулары беткән,
Похоронкаларның – карасы.
Алар күпләр... Кемнәр?
Белмисез –
Һәммәсенә инде тик бер исем,
Фамилияләре –
Билгесез…

Рәхим Рахман

«КУ» 02, 2025

Фото: unsplash