АЗ СӨЙЛӘП, КҮП ӘЙТКӘН ШАГЫЙРЬ

Шагыйрь һәм журналист, Татарстанның атказанган мәдәният хезмәткәре, Гаяз Исхакый исемендәге премия лауреаты Рөстәм Акъегетнең (Рөстәм Габдрахман улы Фәйзуллинның)  (1951–2000) тууына – 75 ел.

Ул Балык Бистәсе районы Бал­тач (Юлсубино) авылында дөньяга килә. 1974 елда Казан дәүләт университеты филология факультетының рус-татар бүлеген тәмамлый. Һәм шул вакыттан аның бөтен гомере Татарстан дәүләт телерадиокомпаниясе белән бәйләнгән. Озак еллар дәвамында Татарстан радиосының әдәбият-сәнгать тап­шырулары редакциясенең баш мөхәррире булып эшли.
         Татарстан язучылар берлегенең рәсми сайтындагы мәгълүматларга күз салыйк:

«Ак болыт шәүләсе» (1987), «Төнге сулар» (1991), «Янды бер шәм таңнарда…» (2001) һәм рус теленә тәрҗемәдә «Карусели осени» (2006) җыентыклары Рөстәм Акъегетне  бүгенге татар шигъ­риятенә яңа сулыш алып килгән, тирән фәлсәфи үзенчәлекле шагыйрьләр­нең берсе буларак танытты.
Каләмдәше Рөстәм Кутуй «Янды бер шәм таңнарда…» җыентыгына язган кереш мәкаләсендә, Акъегетнең иҗатына бәя биреп, болай ди: «Чын шигърияткә күпсүзлелек килешми, аңа аз сөйләп, күп әйтү хас. Монда иң мөһиме – ишарә… Аның каләме җыйнак, сүзе кыска, мәгънәсе-хисе тирән, ләкин анда, әйтик, Гомәр Хәйямдагы кебек, акыл өйрәтү дә, әхлакка күндерү дә, ачы каһкаһә дә юк. Ул маңгайга-маңгай чәкәләшүне түгел, сүздән сын-сурәт ясауны өстенрәк күрә. Бу, мөгаен, акварельдер. Ел фасылларының очрашкан мәле, хис-тойгыларның тәрәккыяте, үч һәм сөю, ут һәм су, тынлык һәм хәрәкәт – сүз рәссамының төс-буяулары бихисап. Яр буенда бер үк төстәге, бер үк зурлыктагы ике чуер­таш табып булмый. Хәер, учтан учка коеп тараткан чакта ул ташларның бөтен яме, хак-бәһасе әнә шул бер-беренә охшамауда, тәңгәл килмәүдә, кабатланмауда чагыла түгелме?..»

Акъегет озак еллар буе Татарстан радиосындагы «Тел күрке – сүз» һәм телевидениедәге «Туган тел дәресләре» тапшыруларының мөхәррире булды. Ул шулай ук үткәндәге рухи-әдәби мирасны халыкка кире кайтару, күренекле шәхесләрнең иҗатына, иҗтимагый эшчәнлегенә ка­гылышлы документларны, төрле газета-журналларда чәчелеп яткан яки совет заманында идеологик сәбәпләр аркасында матбугатка чыкмый кал­ган истәлек-хатирәләрне, радио-телевидение фондларында сакланган чыгыш-язмаларны эзләп табу, бергә туплау һәм матбугатка, укучыларга тәкъдим итү юнәлешендә дә күп еллардан бирле максатчыл эш алып барды...”

Хәзер исә QR-код ярдәмендә сайтыбызга керик тә шагыйрьнең шигырьләренә язылган җырлар тыңлап, рухына бер дога кылыйк.

Фото: архив