Мин – туган телнең сакчысы

Мин – туган телнең сакчысы,
Һәр көнне сакта торам.
Аллаһым шундый язмышны
Биргәнгә шөкер кылам.
Туган тел бик тә кадерле –
Татлы сүзләрне җыйган.
Шул сүзләрнең яңгырашы –
Бәхетле чорың булган.

Әбием сөйләгән сүзләр
Җаныма шифа биргән.
Шул сүзләр җитми бүгенгә,
Иркәләп-назлап сөйгән.
Әнием көйләгән җырлар –
Милли моңнардан торган.
Шул моңнарга күңеленең
Тирән серләре сыйган.
Әтием кылган гамәлләр
Моңлы җыр булып калган.
Җырлар өчен дип ул
Туган телемнән сүзләр алган.
Гадиләрдән-гади телем,
Син – илһам чыганагым.
Йөрәгемә кергәнсең син
Сөте белән анамның.

Хашия ТӨХБӘТУЛЛИНА

«КУ» 05, 2026

Фото: Шедеврум ии