Мин синең...

Мин – синең буранда ышыгың.

Язылыр җырыңның шигыре.

Күңелең түрендә яшьнәгән

Язларның иң матур бер гөле.

Мин синең хыялый болытың.

Иңнәрдә канатлар бар сыман...

Бергәләп кочабыз җиһанны

Куышып болытлар артыннан.

Мин –  синең кулдагы китапта

Хәрефләр, матурлык, җылылык.

Ак биткә язылыр хикәяң,

Мәңгегә истәлек булырлык.

Мин – синең, син – минем дәвамым,

Йөрәктә башкага юк урын.

Теләрмен гомерем буена

Сөюнең мәңгелек булуын.

                     Гөлфия ШИҺАПОВА           

Фото: Шедеврум ии