Мәхәббәт һәм табигать

Җептәй сузган кояш нурын җиргә,
Күккә кунып сайрый тургаем.
Зәңгәр күлнең бәллүр көзгесенә
Алыштырмас яшьлек тугаен.
Керфек очларыңнан сөю тама,
Шыткан чәчкә сыман күңелең.
Моң дулкыны тия ярларына
Биләп алган бәхет күгенең.
Киптерми лә сөю тамырларын,
Чык тамчысы иңгән су булып.
Мәхәббәтем олы табигатьтә
Чишмә сыман агар моң тулып.

Гөлшат СОЛТАНГУЛОВА.

«КУ» 10, 2025

Фото: Krea ai