Җилләр елый...

Көнбатыштан шомлы хәбәр килсә,
Яшь толларның бәгырьләрен кисә...
Улы яуда калган чал ананың
Җанын телеп елак җилләр исә...
Еш күзәтәм, сыеша алмый күктә,
Кургаш болытларның агышларын,
Берсен-берсе этеп талгын гына
Еракларга китеп барышларын...
Эх, алсачы алар аналарның
Кайгы-хәсрәт тулы сагышларын...
...Кыш уртасы... Карлы яңгыр ява,
Ана бәгърен телеп тамчы тама.
Яшәү ямен әле татымаган
Яшь җаннарга әйтерсең лә дәва –
Таштай каткан бәгырьләрне юып,
Ап-ак карга тозлы яше тама.

Марсель ШӘРӘПОВ.

«КУ» 01, 2025

Фото: unsplash