Әниле чак

Әниле чак – ваемсыз чак,
Сиңа тими бер җил дә.
Куркынычны җиңеп була,
«Әйтәм, – диеп, – әнигә!»
Әниле чак – кадерле чак,
Яшисең тик бер көйгә.
Кочак җәеп каршы ала
Әниең җылы өйдә.

Әниле чак – иң рәхәт чак!
Карамыйча бернигә,
Серең сөйләр кеше була,
Иптәш тә ул, әни дә.
Әниле чак – бәхетле чак!
Киттең бик тиз син нигә?
Ниләр биреп кайтып була,
Әниле рәхәт өйгә?!

Гөлназ ЗАКИРОВА

«КУ» 02, 2026

Фото: Шедеврум ии