Тукай районы Күзкәй авылында татар халкының традицияләренә тугры калалар

Тукай районы Күзкәй авылы китапханәсендә еш кына кич утырулар оештырыла, дип яза районның "Якты юл" газетасы. «Хәтирә» клубы әгъзалары дус-ишләре, күрше-күләннәре белән бергә төрле чаралар үткәрә. Бу юлы алар, әнкәйләребезнең шөгыле онытылмасын дип, йон, каба-орчыклар алып килеп, кул эшенә җыйналдылар. «Баксаң, традицияләребез онытылмаган икән әле. Кемдер йон язарга, икенчеләр йон эрләргә, калганнар бәйләмгә керештеләр», – ди Күзкәй авылыннан Тәнзилә Шәйхенурова. Уен-җырсыз нинди кич утыру инде ул? Ике гармунчы уйный башлау белән, кич утыручылар шаян такмаклар да, моңлы татар көйләрен дә җырлап җибәрделәр. Мәкаль-әйтемнәр, табышмаклар да әйтештеләр. Бер-берләреннән бәйләү үрнәкләре дә өйрәнделәр. Уңышлары да мактанырлык шул, Суфия Шәмсетдинова бәйләгән башмаклар теләсә нинди күргәзмәләргә куярлык. «Кышкы озын кичләребез шулай сизелми дә бергә-бергә күңелле уза тора», – ди кич утыруга җыелган авыл халкы.

Чыганак: http://tatar-inform.tatar

Нравится
Поделиться:
Реклама
Комментарии (0)
Осталось символов: