Татарстан Дәүләт җыр һәм бию ансамбле коллективы режиссер Георгий Ковтун белән "Изге бакча" спектаклен куя

Татарстан Дәүләт җыр һәм бию ансамбле коллективы белән Санкт-Петербург режиссеры Георгий Ковтун Идел буе Болгар дәүләте риваятьләренә нигезләнеп, “Изге бакча” спектаклен куя.

Бу куелышта 80нән артык артист катнаша, җырчылар, биючеләр, музыкантлар барысы да акробатика номерларын өйрәнә, үзләрен драма артисты ролендә сынап карый.

Ике бүлектән торачак спектакльнең эчтәлегендә борынгы Болгар тирәсендә алма бакчасы турындагы риваять тасвирлана. Бакча шәһәр белән бер вакытта юкка чыгарылган. Хан кызы әтисенең эшен дәвам итәргә омтылып, бакчаны яңадан торгызырга була, аңарга батыр егет ярдәмгә килә, һәм ул алмагач ботагын алып кайту өчен Ефәк юлы буйлап ерак сәяхәткә чыгып китә.

“Татар тамашачысы ансамбль артистларын сәхнәдә яңа яктан ачачак, - дип искәртте Георгий Ковтун Казанда беренче тапкыр оештырылган ачык репетициядә. - Ә спектакльнең төп идеясе – тереклекне бары тик тереклек кенә бирә ала дигән фикер. Кеше Туган иленә кайтып, тормышны торгызу өчен катлаулы, кырыс юл узарга тиеш".

Ансамбльнең сәнгать җитәкчесе Айрат Хаметов сүзләренчә, бу куелышка махсус 500 костюм тегелгән, эскизларны Әсәл Исмәгыйлова ясаган. Музыка өчен композитор Радик Сәлимов җаваплы. Спектакльдә декорацияләр өчен 3D-технологияләр файдаланылачак.

Фәлсәфи-тарихи эксперименталь драманың премьерасы Казанда, М.Җәлил исемендәге Татар академия дәүләт опера һәм балет театры сәхнәсендә 12 декабрьгә планлаштырылган.

Нравится
Поделиться:
Реклама
Комментарии (0)
Осталось символов: