Рөстәм Миңнеханов Казан ЗАГСы "касә"се янында барслар һәм зилантлар сыннарын ачты

Кичә Татарстан башкаласында "Казан" гаилә үзәге янында Даши Намдаковның барслар һәм зилантлар сыннарын ачу чарасы узды. Чарада Татарстан Президенты Рөстәм Миңнеханов һәм сыннар композициясе авторы үзе катнашты. Искәртеп үтик: зилантлар һәм барслар сыннарын 9 июньдә җыя башлаганнар иде. Яр буендагы мәйданчыкка алар сүтелгән килеш китерелде. Башта зилантлар пары җыелды. Даши Намдаков авторлыгындагы мифик затлар сыннары Италиядән кайтарылган бронзадан коелган.