Мәскәү мөселманнары өчен ирекле көрәш дәресләре оештыралар

Мәскәүдә яшәүче физик культура укытучысы Ренат Азисов Мәскәү мөселманнары өчен ирекле көрәш дәресләре оештыра.

Әлеге гамәлнең максаты турында "Татар-информ" хәбәрчесенә сөйләгәндә, Ренат Азисов: "Әлеге спорт төре белән шөгыльләнергә теләүчеләр бар, ләкин егетләргә бу хакта даими исләренә төшереп торырга кирәк, – диде. – Башта бик теләп йөриләр, ләкин ниндидер сәбәпләр аркасында ахырга таба сүлпәнәяләр. Дәресләргә күбрәк минем танышларым килә, алар үз танышларын чакыра. Интернет аша белеп килүчеләр дә бар. Якынча 5-6 кеше җыела".

"Үземнең спорт разрядым бокс буенча булганга, әлегә мин оештыручы ролен гына үтим. Дәресләрне башка тренерлар алып барачак . Хәзер үзем дә башкалар белән беррәттән шөгыльләнәм,” – дип хәбәр итте Ренат Азисов.

Ирекле көрәш дәресләрен Мәскәүнең ислам мәдәни үзәге спортзалында оештырырга ниятлиләр.

Чыганак: http://tatar-inform.tatar