"Ислам дине юлына бас­кач, бөтен дөньям үзгәрде" - Ренат Ибраһимов (ӘҢГӘМӘ) ("ВТ")

Күптән түгел Россиянең һәм Татарстанның халык артисты Ренат Ибраһимов үзенең 70 яшьлек юбилеен билгеләп узды. Шул уңайдан, баритон тавышлы җырчы туган шәһәрендә кунак булып китте. Әңгәмә вакытында сигез бала атасы үзенең намазга басуы, иҗаты һәм “Пусть говорят” тапшыруында катнашуы хакында сөйләде. – Ренат әфәнде, Казан Сезнең күңелегездә аерым урын билиме? – Ярты гасырга якын гомерем Казанда узды. Мин монда 50 яшемә кадәр гомер кичердем. Мәктәп һәм консерваториядә белем алу, опера театры һәм фи­лармониядә эшләү еллары шәһәргә булган мәхәббә­темне тагын да арттырдылар. Гомеремнең зур өлеше монда узды бит. – Сезнең бүгенге иҗа­тыгыз ни хәлдә? Концертлар белән еш чыгасызмы? – Мин үземне сәхнәдә яхшы хис итәм. Күп вакытымны тавыш яздыру сту­дияләрендә үткәрәм. Чы­гыш­ларымның һич­кайчан туктаганы юк, чөнки һәрва­кыт иҗат эшендә кайныйм һәм концертлар белән дә чыкмый тормыйм. – Сезне котларга була, чөнки юбилей елыгызда дөньяга сигезенче балагыз аваз салды. Балаларыгыз арасында Сезнең иҗат эшегезне дәвам итәргә теләгән “кечкенә җырчы” бармы? – Олылары арасында юк, ә менә кечеләренең дүртесе дә музыкага гашыйк. Җыр­лыйлар, рәсем ясыйлар, бии­ләр. Аларның минем дәвам­чым булу-булмауларын әй­тергә әле бик иртә дип саныйм. Мәктәптә уңай бил­геләргә генә укыйлар, укытучылары да алардан бик канәгать. Җыр һәм фортепианода уйнау бәйгеләрендә һәрдаим катнашып, призлы урыннар яулыйлар. – Сез Россия эчендә дә, күп кенә чит илләрдә дә концертларыгыз белән чыгыш ясыйсыз. Татар тамашачысы белән башкалар арасында аерма бармы? – Аерма бар, һич­шиксез. Тик мин бу аерманы безне­келәр өчен уңай дип әйтмәс идем. Мин чит илләрдә еш булам һәм чыгыш ясыйм. Хәзер бераз сирәгрәк йө­рим, билгеле. Чит илдә һәр бала мәк­тәпне бетереп чыкканда бер музыка уен коралында уйный белергә тиеш. Беренче вакытларда: “Ничек шулай була икән?” – дип мо­ңа бик аптырый идем. Хә­зер аңлыйм: алар югары уку йортына аяк басканда, ирек­ле рәвештә ноталар буенча уйный алалар һәм университетка шәхес булып килеп керәләр. Классик музыканы чит ил яшьләре бик яхшы аңлый. Гаҗәп, әлбәттә. – Чит илләрдә чыгыш ясаганда, репертуа­ры­гыз­га татар җырларын да кушасызмы? – Татар халык җырларын зур канәгатьлек белән башкарам һәм бик яратам. Чит илләргә гастроль белән чык­канда, программага ике-өч татар җырын кушмыйча калдырмыйм. Кайда гына булсам да, татар җырларын тамашачылар бик яратып һәм зур хозурлану хисләре белән тыңлыйлар. – Республика күләмен­дәге зур музыкаль бәй­геләр арасында Милли музыкаль премиянең уз­ган елгы тантанасында Сез үзегез катнаштыгыз. Быел да бишенче тантана яңа онытылмас миз­гел­ләргә бай булды. Сезнең пре­миягә мө­нәсәбәтегез нинди? – Премия һәр очракта милли җыр сәнгатен үсте­рү­гә файдалы йогынты ясый. Җырларны сайлап алу тәр­тибе – бөтенләй икенче мәсьә­лә. Премияне оештыручылар бу тәртипкә аеруча зур игътибар бирергә тиеш. Төрле җырлар булсын, бер төрдәгеләр генә урын алмасын. Минем фикерем төрле жанрдагы милли җырлар яңгыравына кайтып кала. – Күпбалалы ата булуыгыз турында сорап үт­тек. 70 яшьлек юбилее­гыз­да түбәндәге сорау да урын­лы булыр. Сез бү­ген­ге көнкүрешегездән канә­гатьме? – Бик канәгать. Берен­чедән, мин дин юлына бас­тым. Эчке дөньямда зур үз­гәрешләр булды, алар әлегә кадәр бара. Моның өчен мин бик шат. Ком­со­мо­лец-атеист булудан дини кешегә кадәр барып җиттем. Тормыш иптәшем дә диндә. Без бергә намаз укыйбыз, Мәккәдә хаҗ кылып кайттык. Балаларыбыз да бездән күреп намазга басты. Хәзер аларның кеч­кенә генә үз намазлыклары бар. Ислам дине юлына бас­кач, бөтен дөньям үзгәрде. Коръәндә шулай язылган бит: “Үзең үзгәр һәм тирәң­дәге дөнья да үзгә­рер”. – Зур бәйрәмегез уңа­ен­нан татарстанлылар­га нинди теләк­ләре­гезне җит­керергә телисез? – Татарстанлыларны бә­хет­ле дияргә була, чөнки рес­публика һәм андагы яшәү шартлары бары яхшы якка гына үзгәрә. Казан да бик сок­ландыра. Спорт тө­зелмә­ләре бик күп, юллар мәсьә­ләсенә зур игътибар бирелә, шәһәребезне кү­рер­гә килүчеләр арт­кан­нан-арта. Казан зур мә­дәният үзәгенә әверелеп бара. Алар­га шушы бәхетле тө­бәктә кадер­ле булып яшәү­ләрен теләп калам.
Ильяс Шаһиев, Ватаным Татарстан
фото: picssr.com

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: