Логотип Казан Утлары
Татар матбугаты

Иң шәп ресторанда нәрсә белән сыйланып була?

Татарстанда туристлык хәрәкәте югары үсештә. Кунаклар кайда тамак ялгарга, кайда тукталырга, дип интегеп йөрми. Бүген башкалада 400ләп тукталу (кунакханә, отель, хостел),  меңнән артык тамак ялгау урыны исәпләнә. Алар арасында аягүрә ашау нокталарыннан алып, затлы рестораннарга кадәр бар. Кайсында тукталырга икәнен, һәр кеше үзе сайлый. Билгеле, ул иң яхшысына, иң уңайлысына кызыга. Шулай итеп, кунакханә һәм рестораннар арасында үзара көндәшлек барлыкка килә, берсеннән берсе уздырып, үзенә кунакларны җәлеп итү максаты белән яна башлый. 26-28 октябрь көннәрендә “Казан ярминкәсе” күргәзмәләр үзәгендә ресторан һәм кунакханәләр бизнесының “Horeca  Kazan 2016” дип аталган күргәзмәсе узачак. Ул ресторан һәм отель хуҗалары, пешекчеләр, инвестор һәм идарәчеләрне бер мәйданга җыя. Күргәзмә кысаларында берничә бәйге уздыруны күздә тоталар. Анда ресторан хуҗалары, кулинария өлкәсендә белем алучы студентлар катнаша ала. Алар арасында иң яхшы ресторан һәм кунакханәне билгеләү күпләрдә  зур кызыксыну уята. – “Тatarstan Top Hotels Award” һәм “Tatarstan Top Restaurans Award” Премияләре әнә шул көндәшлектә җиңгән җәмәгать урыннарын билгеләргә ярдәм итәчәк, – диде Татарстанның туризм буенча дәүләт комитеты рәисе Сергей Иванов «Татар-информ» мәгълүмат агентлыгында узган очрашуда. – Бу кунакчыллык өлкәсендәге тәүге премия.

Кунакханәләр буенча әлеге премия 5 категориядә (4-5 йолдызлы, 3, 1-2 йолдызлы кунакханәләр, мини-отель һәм шифаханәләр), 6 номинациядә бүленәчәк. Аларга “Иң яхшы хезмәт күрсәтү”, “Ел меценаты”, “Кунак сайлавы”, “Иң яхшы туристик отель” кебек номинацияләр биреләчәк. Моннан тыш, җиңүчеләр алтын, көмеш, бронза баскычта билгеләнәчәк. Бәйгегә старт март аенда ук бирелгән, анда катнашырга 100дән артык гариза кабул ителгән. Шуларның 60ы икенче этапка узган. Җиңүчеләрне сайлау ике этаптан тора. Беренче өлештә катнашучылар “Яшерен кунак” билгеләве һәм халыкара рейтинг компаниясе тарафыннан тикшереләчәк. Икенче этапта исә мәртәбәле жюри аларны “Яшерен кунак” нәтиҗәләре, җаваплылык, интерьер, башка бәйгеләрдә катнашуы буенча сыный. Республиканың иң яхшы рестораннары рәтенә көч сынашырга Казаннан кала, Чаллы, Әлмәт, Алабуга җәмәгать туклану нокталары да теләк белдергән. Алар “Иң яхшы кухня”, “Иң яхшы милли кухня”, “Иң яхшы шәһәр яны рестораны”, “Иң яхшы интерьер”, “Ел бармены”, “Ел пешекчесе” кебек номинацияләр өчен көрәшә. Җиңүчеләрне билгеләү шулай ук җиңелләрдән түгел. Иң-иңнәр исемлегенә эләгү өчен катнашучыларга өч этап аша узарга туры килә. Беренче баскычта аларга “Яшерен кунак” бәясен алу мөһим. Ул исә хезмәткәрләрнең эшен, ризыкны табынга чыгару, заказның әзер булу вакыты, бинаның бизәлешенә игътибар итәчәк. Икенче баскычта жюри “Яшерен кунак” игълан иткән нәтиҗәләрне һәм катнашучылар турындагы мәгълүматны өйрәнә. Җиңүчеләрне билгеләүдә “Кара тартма” зур роль уйнаячак. Монда бар җаваплылык шеф-поварлар җилкәсенә төшә. Алар тартмада яткан ризыклардан үзенчәлекле ризык әзерләргә тиеш. Бәйге Татарстанныкы булса да, премия исемнәре чит телдә. Бу журналистлар арасында бераз ризасызлык тудырды. Оештыручылар исә аны туристларның игътибарын җәлеп итү максатында дип аңлатты. Теге яки бу номинациядә җиңгән оешма Мактау кәгазен бинаның иң күренә торган җиренә элеп куя ала. Бу исә чит илдән килгән туристларга нинди затлы ресторан яки кунакханәгә тукталуын искәртеп тору өчен кирәк. – Премияне  булдыру тәкъдименә биш куллап риза булдык, – ди Татарстанның сәүдә-җитештерү палатасы рәисе урынбасары Артур Николаев. – Мондый эчтәлекле бәйгеләрне 15 еллап элек үткәрә башларга кирәк булган. Тик әле дә поезд китмәгән – вакытында өлгердек.

Казан берничә ел рәттән эчке туризм буенча лидерлыкны бирми. Казанның һәм республиканың кунакчыллыгы мактаулы урында. Тик башкалага профильле бизнес идарәчеләре аралаша, тәҗрибә уртаклаша торган бәйгеләр җитми иде. Еш кына журналистларга командировка белән чит илләрдә булырга туры килә. Бүген бездәге хезмәт күрсәтү Европа илләреннән дә узып бара. Кунакханә, рестораннар көн саен үсештә. Ике атна элек кергән ресторанга кабат килсәң, андагы үзгәрешне күрми калу мөмкин түгел. Әлеге бәйгедә катнашырга теләк белдерүчеләр үзләрен иң-иңе, дип саный. Димәк, аларның мактанырлык яклары бар. Катнашырга батырчылык итмәүчеләр исә, хата-кимчелекләрен бетерү өстендә эшләячәк. Шуңа күрә бу бәйгене ел саен үткәрү кирәктер.

Чыганак: http://intertat.ru

Иң мөһим һәм кызыклы язмаларны Татмедиа Telegram-каналындаукыгыз

Нет комментариев