Хәйрия өлкәсендә Россия 129нчы! Ә Казан?..

- Игелек атнасына 5 сентябрьдә старт биреләчәк. Ул көнне бу темага мәктәпләрдә ачык дәресләр, ә урта һәм югары уку йортларында түгәрәк өстәлләр үткәреләчәк. Һәр хәйрия оешмасы үзе һәм проектлары турында җәмәгатьчелеккә сөйләячәк. Теләгән һәркем төгәл адресатлар буенча ярдәмгә килә ала, шулай ук волонтер буларак кайсы фондка ярдәм итәргә теләүләре турында да уйланыр, – дип белдерә Казан шәһәре Башкарма комитеты җитәкчесенең беренче урынбасары Дамир Фәттахов.Эшмәкәрләр дә кушылсын! Хәйрия оешмалары бу эшкә бизнес вәкилләрен дә җәлеп итәргә уйлый. Халыкка хезмәт күрсәтү өлкәсендә эшләгән кафе, ресторан, кибет, чәчтарашханәләр махсус бәя буенча хәйрия тәкъдимнәре булдыра ала, дип саный алар. Мисал өчен, үз клиентларына бер чынаяк игелек кофесы яки чәе тәкъдим итеп, аннан кергән акчаларны хәйрия проектларына җибәрергә мөмкин. Игелек атнасы марафонын 10 сентябрьдә тәмамларга ниятлиләр. Казанның һәр районындагы парк һәм скверларда бу көнне гомумшәһәр ярминкәсе узачак. Ярминкә программасында иҗат коллективлары чыгышы, төрле мастер-класслар, интерактив мәйданчыклар көтелә. - Шунысы да мөһим: бу чараларның берсе дә мәҗбүри рәвештә эшләнергә тиеш түгел. Аеруча бу мәктәпләргә кагыла, чөнки балалар, башкалар белән чагыштырганда, ялганны тиз сиземли. Ә ссуз, вузларда игелек темасына лекцияләр белән генә чикләнү аз. Студентлар хәйрия проектлары буенча үзләре тәкъдим белән чыксын. Аларга шаблоннар бирү кирәкми, – дип ассызыклый Казан Мэры Илсур Метшин. Бу чара уңаеннан, республиканың хәйрия проектлары үз эшен башлап җибәрә. Мисал өчен, “Ак Барс Созидание” фонды 5 сентябрь көнне Идел буе федераль округындагы балалар йортларында тәрбияләнүчеләргә белем бирү проектын ачып җибәрә. 2015 елның хәйрия эшчәнлеге дөнья рейтингы буенча беренче урында Мьянма тора: биредәге халыкның 91 проценты хәйрия эше белән шөгыльләнә. Ә Россия исә 145 илдән 129 урынны били. Чөнки безнең илдә халыкның бары 20 проценты гына хәйриячелеккә битараф түгел. Кешеләр, гадәттә, фондларга ышанмау сәбәпле, турыдан-туры гаиләләргә булышырга күнеккән. Бу саннарны ишеткәч, Илсур Метшин да шаккатып, “Казан дәрәҗәсендә бу вәзгыятьне үзгәртергә тиешбез”, – диде. Хәйрия эшен – интернетта Тиздән Татарстанда игелек эшләрен башкару өчен уңайлы электрон мәйданчык та булдырылачак.  Әлеге идея быелның апрель аенда ук яңгырады. Биредә хәйрия фондлары һәм аларның проектлары турында бөтен мәгълүматны биреп барырга телиләр. Иң уңайлы, ачык һәм гади сервис буларак «Добро.mail.ru» мәйданчыгы сайланган. Август ахырына «Добро.mail.ru» белән хезмәттәшлек итү турындагы документка кул куярга телиләр. - Без бу платформаны өйрәнергә күп вакыт сарыф иттек. Мәгълүматлар базасының дөреслеге һәм бүгенге көнгә әһәмиятлелегенә бәйле сораулар бик күп иде. Кешеләрнең аферистлар белән очрашмавы, ә турыдан-туры адреслы ярдәм күрсәтүе мөһим, – ди Илсур Метшин. Хәйрия оешмалары җитәкчеләре тарафыннан “Игелек атнасы”н традицион шәһәр чарасына әверелдерү теләге дә бар. Шуңа да Казандагы хәйрия хәрәкәтенең үз атрибутикасы, стиле булырга тиеш, дип саныйлар. “Татарстанның күп балалы гаиләләре” оешмасы рәисе Артем Кузнецов әйтүенчә, әлеге чараны уздыруда күп балалы гаиләләр дә үз өлешен кертергә җыена. – Бүген без Казанның төрле рейтингта әйдәп барган урыннарда торганын күрәбез. Ләкин, шәхсән мин, мэр буларак, икътисади күрсәткечләр белән беррәттән, Казан иң игелекле шәһәр булуын да телим, хәйриячелек, меценатчылык, башкаларга ярдәм итәргә әзер булу һәркемнең күңелендә булсын иде, – ди Казан Мэры. Чыганак: Интертат.ру