Логотип Казан Утлары
Татар матбугаты

"Әгәр укытучыга хөрмәт булмаса, һәркем үзенчә яши башлаячак" - Рөстәм Миңнеханов

Узган ел “Иннополис”та беренче тапкыр эшкә керешүче яшь педагог­ларны котлаганнар иде. Быел “акыллы шәһәр”гә укытучы булырга җыен­ган яшьләрне, бердәм дәүләт имтиханнарында 100 балл туплаган егет-кызларны җыйдылар. Президент аларга ноутбук бүләк итте.

Көн-төн уку нәтиҗәсе бу!

– Сезне зур җиңүегез бе­лән котлыйм. Мәктәптә яхшы белем алу ул Галәмгә чыгуга тиң. Моңа сез үзегезнең, әти-әниләрегезнең, укыту­чы­ла­рыгызның тырышлыгы бе­лән ирештегез, – диде Рөс­тәм Миңнеханов, тәбрикләү сүз­ләрен җиткереп.

Быел республикада 100 баллык нәтиҗәләрнең саны 123 иде (узган ел – 135). Арадан дүрт укучы ике һәм аннан күбрәк фәннән шундый күр­сәткечләргә иреш­кән. Мамадыш районының 2 нче лицей укучысы Алинә Нурмиева, Казанның 177 нче лицеенда белем алган Алмаз Дәү­ләт­шин – икешәр фәннән, ә Ка­занның 139 нчы гим­назия­сен тәмамла­ган Илсинә Гыйль­мет­динова, Бөгелмә­нең 16 нчы мәктәбе укучысы Анастасия Золотухина өчәр фәннән 100 балл туплаган. Быел соңгы дүрт ел эчен­дә беренче тапкыр җәмгыять белеменнән иң югары балл җыйган укучы да булды. Ул Чаллының 78 нче лицеенда белем алган. Рус теле буенча 100 баллга ия булучылар саны – 51. Бу – былтыргыдан 37гә кимрәк. Математика, гео­графия имтиханнарында да 100 балл алучылар ки­мегән. Шул ук вакытта физика, химия, биология, информатика, рус әдәбиятын яхшы бе­лүчеләр саны арткан. Мамадыш кызы Алинә Нурмиева үзенең ике фәннән югары балл җыюын ишеткәч, аптырап калган. “Мин нәти­җәләрем 90нан күбрәк булыр дип уйлаган идем. Ләкин 100 сүзен ишеткәч, шатлы­гым­ның чиге булмады. Әл­бәттә, моңа көн-төн уку нә­тиҗәсендә ирештем. Бернинди репетиторларга йөр­мичә бу! Чөнки үз укытучыларыбыз бик яхшы белем бирде. БДИны хуплыйм. Бө­тен бала да бертигез шартларда имтихан тапшырып, теләгән уку йортына укырга керә ала. Мин Казан дәүләт медицина университетында табиб белгечлеген үзләште­рә­чәк­мен”, – ди Алинә. Кызның әнисе Галина ханым әйтүенчә, Мамадыш райо­нында балаларның сә­ләтен үстерүгә зур игътибар бирелә. Бушлай түгә­рәкләр эшли, транспортта йөргән өчен дә акча түләргә кирәк­ми икән. Мәгариф бүлеге, БДИга әзерләнү өчен, атнага ике тапкыр тү­гәрәк­ләр оештырган. Мондый мөм­кин­лекләр тудырган өчен ул район җитәк­челегенә рәхмә­тен җит­керә. Президент “акыллы­баш”­ларга бер урында гына таптанмыйча, белемнәрен гел яңартып торырга кушты. Соңыннан аларны кызыксындырган сорауларга җа­вап бирде. “Мин 100 балл туплаучы түгел, җавап бирә дә алмас­ка мөмкинмен”, – диде Президент, шаяртып. Бө­гел­мә укучысы Гөлнара Ла­тый­пованың бүген дәрә­җәле бул­ган һөнәрләр хакында беләсе килә. “Әгәр элек кеше бер һөнәр үзләш­тереп, гомерен шуңа багышласа, хәзер хәл­ләр башкача. Бүген тормышта биш-алты һөнәр алыш­ты­рырга туры килергә мөмкин. Энергетика, медицина, IT-тех­но­ло­гия­ләр­гә бәй­ле яңа әй­берләр күп. Әлеге белгеч­лекләргә их­тыяҗ зур”, – диде Рөстәм Миң­неханов. БДИга карата аның фикере начар түгел. “Хә­зерге вакытта башка бәя­ләү формасы юк. Имтихан бирмичә, көндәшлеккә сә­ләт­ле булып булмый”, – диде ул.

Укытучының дәрә­җәсе үзеннән тора

Яңа уку елында республикада “Безнең яңа укытучы” грантын откан 200гә якын яшь укытучыны мәк­тәпләрдә көтәләр. Аларның хезмәт хакына ай саен 7,5–10 мең сум акча өстәләчәк. Президент фикеренчә, укытучыларның дәрәҗәсе күп очракта үзләреннән тора. “Әгәр укытучыга хөрмәт булмаса, һәркем үзенчә яши башлаячак. Тәртип булырга тиеш. Баланы кызыксындыра белү мөһим. Монда прән­неге дә, башкасы да кирәк. Безнең физикадан укыткан мәктәп директоры дәресен­дә башка фәннәрне начар үзләштерүчеләр дә ким ди­гән­дә “4ле”гә укый иде. Хә­зерге вакытта укытучылар өч елга бер мәртәбә белемен күтәр­сә, киләчәктә әлеге таләп ел саен куелырга мөм­кин”, – диде Рөс­тәм Миңне­ханов.  
Сәрия Мифтахова, Ватаным Татарстан

Иң мөһим һәм кызыклы язмаларны Татмедиа Telegram-каналындаукыгыз

Нет комментариев