"Без һәрвакыт өмет белән яшәргә тиеш" - Васил Шәйхразиев

“Республикада татар теле мәсьәләсендә кабул ителгән карар безгә алга карап эшләү өчен юл күрсәтү дә”, – дип белдерде Татарстанның Премьер-министры урынбасары, Милли Шура рәисе Васил Шәйхразиев кичә Дәүләт Советында журналистларга. Ул сессиягә кадәр ата-аналар белән җыелышлар уздырылганын искәртеп: “Бүген иртән генә карадым: Чаллыда 70 процент ата-ана татар телен сайлады, дип язып чыкканнар. Республика күләмендә бөтен эшләр эшләнгән. Республикада мондый карар кабул ителү безгә алга карап эшләү өчен юл күрсәтү дә. Ошыймы, ошамыймы – карар бар. Бүген безгә шуңа таянып эшне алып барырга кирәк”, – дип белдерде. Васил Шәйхразиев бу мәсьәләдә оптимист булуын билгеләп узды. “Бүгенге көн белән генә яшәргә язмасын. Без һәрвакыт өмет белән яшәргә тиеш. Өметсез шайтан гына була”, – диде. Васил Шәйхразиев Милли Шураның 300ләп актив вәкиле Казанда булуын искәртте. “Мин бу мәсьәләне президиум каршында күтәрәчәкмен. Үзара аңлашачакбыз, карар буенча үз мөнәсәбәтебезне белдерәчәкбез”, – диде.

---

Гөлнар Гарифуллина, Татар информ

Фото: Салават Камалетдинов