Казанда "Татарстан халыклары бәйрәмнәре" интерактив энциклопедиясен тәкъдим итү чарасы узачак

18 майда Татарстанның Халыклар Дуслыгы йортында «Татарстан халыклары бәйрәмнәре» интерактив энциклопедиясен тәкъдим итү чарасы узачак. Бу хакта Татарстан Халыклар дуслыгы йортының матбугат үзәге хәбәр итә. Проект Татарстан өчен дә, Россия өчен дә бик үзенчәлекле. Бу – заманча фәнни тикшеренүләргә нигезләнгән, яз-җәй айларында уздырылучы календарь бәйрәмнәр һәм гореф-гадәтләр турында (Каравон, Сабантуй, Семык, Гырон-Быдтон, Уяв, Балтай, Питрау), музыкаль һәм инструменталь мәдәният, декоратив-гамәли сәнгать, Татарстанның төп халыклары (татарлар, руслар, чуашлар, удмуртлар, марилар, мордвалар, керәшеннәр) этнографиясе турындагы , балалар аңларлык итеп эшләнгән беренче материал. Проектның максаты – республикабызда яшәүче балаларда халык бәйрәмнәренең дөрес күзалларга өйрәтү, шулай ук балалар өчен интерактив энциклопедия рәвешендә кулай һәм кызыклы формада үз халкының һәм Татарстанда яшәүче башка халыкларының мәдәниятына карата хөрмәт һәм кызыксыну тәрбияләү. Проект милләтара һәм динара мөнәсәбәтләрне ныгытуга, милләтара хезмәттәшлекне үстерүгә, Татарстанда яшәүче халыкларның үзенчәлеген, мәдәниятын, телен һәм йолаларын саклауга юнәлдерелгән. Ул Татарстан Республикасы Министрлар Кабинетының иҗтимагый мөһим проектларны чынга ашыруда катнашучы коммерцияле булмаган оешмаларга бирелә торган гранты хисабына башкарыла. Презентация 18 май көнне 13.00 сәгатьтә Татарстан Халыклар Дуслыгы йортының концертлар залында үтәчәк. Биредә проект җитәкчесе – Татарстан халыклары Ассамблеясенең башкарма комитеты җитәкчесе Николай Владимиров, проектның авторы – Традицион мәдәниятны үстерү республикакүләм үзәге директоры, Татарстанның атказанган сәнгать эшлеклесе Фәнзилә Җәүһәрова, Традицион мәдәниятны үстерү республикакүләм үзәгенең фәнни хезмәткәре, Татарстан журналистлар Союзы әгъзасы Гөлнара Мансурова, шулай ук проектны тормышка ашыручылар чыгыш ясаячак. Чарага Татарстанның милли-мәдәни автономияләре, Татарстан Мәгариф һәм фән министрлыгы, Татарстанның Мәдәният министрлыгы вәкилләре чакырулы.
Татар информ

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: