Тырмалап яшимен
Тырмалап яшимен тормышны:
Җыям да туздырам, чистартам.
Эресен ваткалыйм, төрткәлим,
Тарткалап өям йә таратам.
Тырманың өстенә басмаска
Дөньялар өйрәтте бик күптән...
Эрене ватканда, төрткәндә
Уйланып яшәргә бик төптән...
...Ә бүген тырмалар өстенә
Китереп баскалый балалар.
Эрене ватканда, төрткәндә
Карап та тормыйча, басалар!
Тормыш ул уйлауны ярата,
Кисәтә дә кебек: «Шаярма!»
Эрене ватканда, төрткәндә,
Ә тырма һаман да шул тырма!
"КУ" 07,2021
Фото:unsplash
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84