Могҗизалар көтәм

Тылсым барга һаман ышанам мин,

Могҗизалар барга ышанам.

Айга карап, серләремне сөйлим,

Ай да уйчан, миңа охшаган...

Төнге күктән энҗеләрне күзлим,

Теләк телим йолдыз атылса.

Бәхетемнән күккә күтәреләм,

Чәчләремне назлап, таң туса...
Ак карлардан аклык алам җанга,

Төшкән чакта кайнар учыма...

Керфегемә кунган энҗеләрне

Тиңлимен мин бәхет кошына.

Хыялый мин, хыял канатында

Очам күктә, төшәм җиремә.

«Могҗизалар чынга ашар» дигән

Өмет яши күңел түремдә!
 

Гөлара  Шәрипова 

"КУ" 01,2024

Фото: unsplash