Логотип Казан Утлары
Яңа исемнәр

Биләрдә

Тагын бер гасыр узгачтын Безнең татар ни кичерер?

Кайчан да бер без китәрбез,

Таулар калыр, Биләр торыр.

Кырык кызның батырлыгын

Күргән тау бу – шуңа горур!

Күңел күзең күпне күрә,

Илгә чыгып йөргән чакта.

Искән җилләр тарих сөйли,

Хәтер төпкелен актара.

Газиз халкым! Синең язмыш

Моңлы һәрчак, үтә кырыс.

Ничә гасыр түгелгән яшь,

Таулар горур, анысы дөрес...

Бу киңлекләр, иңкүлекләр,

Урлар, валлар...

Йоклый тарих.

Аның битләрен язарга

Соңга калмыйк, вакыт табыйк!

Баскычлардан, дога укып,

Төшеп килә абыстайлар.

Ак яулыклы, ак күңелле,

Ниләр уйлый икән алар?

– Сөбханалла, – диләр булыр,

Бу көнне дә күрдек, шөкер...

Тагын бер гасыр узгачтын

Безнең татар ни кичерер?

Телен җуйган кавем күреп,

Биләр таулары селкенер...

 

"КУ" 10, 2019

Фото: Рәзилә Хәйретдинова

Теги: шигырь яңа исемнәр

Иң мөһим һәм кызыклы язмаларны Татмедиа Telegram-каналындаукыгыз

Нет комментариев