Баллы торт

Кирәк булачак:
- он 150 г
- йомырка 3 данә (зурны яки 4 бәләкәйне)
- шикәр комы 100 г
- сода 1 чәй калагы (өймичә)
- бал 100 г

Йомырканы шикәр комы белән купертәбез (якынча 10-15 минут). Масса нык итеп кабара, ныклы күбек барлыкка килергә тиеш.
Балга сода салабыз да, савытны су парына куябыз. Болгата-болгата массаны көрән төскә кергәнче су парында тотабыз (башта ак күбеккә әйләнә, аннан төсе үзгәрә башлый).
Миксерны уртача тизлектә эшләтә-эшләтә күпергән йомыркага кайнар бал массасын берәр калаклап салабыз (миксерны эшләтеп тору мөһим, йормырка уаланырга мөмкин).
Онны иләк аша әз-әзләп салып астан-өскә кашык белән болгатабыз.
Пешерәсе формага салабыз да, әйләндереп алабыз (камыр тигезләшеп, уртасы тау булып кабармасын өчен).
150^градускача кызган мичкә озатабыз (якынча 40-50 минутка).
Әзерлеген уртасына шырпы (таякчык) төртеп тикшерәбез (коры булырга тиеш).

Составында бал булу сәбәпле бисквитның өсте тиз арада кызара башлый. Шуңа күрә, 30 минуттан соң мичне тиз генә ачып өстен фольга белән капларга киңәш итәм.
Торт ясар алдыннан суынган бисквитны 5-6 сәгать суыткычта ял иттеру кулай була.
⠀
Әзер бисквитны өч өлешкә бүләбез hәм пропитка ясыйбыз.
Ул болай ясала:
- бал - 1 чәй калагы
- җылы су - 100 мл

Бал эреп беткәнче, икесен болгатабыз.
Өч коржга бүлеп, калак белән сибәбез.
⠀
Коржлар арасына крем сылап, тортны җыябыз. Кремын болай эшләргә була:
- бер кап сыер мае, бер банка куертылган сөт ("вареная сгущёнка")
- яки 300 г сөт өсте ("сливки" 33%) hәм 300 г куертылган сөт.
Мин өйдә ни бар шуны салдым: сыер мае, йомшак балалар эремчеге hәм карамель (өйдә кайнаткан).
Теләгегез булса, арасына кара җимеш яки чикләвекләр сала аласыз.
Өстен теләгәнчә бизибез дә, суыткычка берәр сәгатькә озатабыз.

Тәмле булсын!

 

Рецепт авторы - Айгөл Таҗиева; vk.com