Юлчылык

Шагыйрь Рәмис Аймәткә

 

Ерак сәфәр безне якынайтты,

Дуслаштырды шигъри юлчылык –

Төрки дуслар дәшкән зур мәҗлескә

Ике шагыйрь киттек юл чыгып.

Казакъ даласында казандык без

Иман биеклеген яңадан.

Балбал ташлар җиргә ныграк иңде

Без китергән сәлам-догадан.

Синең янда насыйп булды миңа

Дан-хөрмәтнең бер уч җылысы.

Чиккән калфак, болгар читегемә

Баш иделәр кече-олысы.

Уздык икәү хисләр алкышында

«Ефәк юлы»дигән келәмнән.

Әхмәт Ясәвинең төрбәсенә

«Тимерказык» бакты галәмнән...

Төркестанның шигъри мәйданында

Шагыйрь дуслар алды уратып.

Очкын булып тамды татар сүзе,

Кардәшлекне канда уйнатып.

Көнчыгышның гамен сискәндереп,

Яңгырады татар шигыре.

Төрки тамырларга куәт бирде

Яңа буын татар шагыйре.

«Татар түгел – бары татар гына!»

Шушы сүздә мең-мең хаклык бар.

Шигъри түгел, төрки мәйданында

Өмет баглый безгә халыклар.

 

"КУ" 8, 2019

фото: vk.com

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: