Урау-урау юллар

Урау-урау юллар аянычлы –

Һич белмисең кайчан егыласын,

Язмышларның кайсы сынаулары

Сиңа каты итеп кагыласын.

Аймыл булып кемнәр яшәмәгән

Эзләгәндә бәхет юлларын,

Һич белмисең – күңелең әрнегәндә

Кем сузасын ярдәм кулларын.

Иркә-назлар һәм чәчәкле язлар!

Кабатлана сирәк, бик сирәк.

Тормыш мәгънәләрен аңлар өчен

Үз юлыңны табу бик кирәк.

Урау-урау юллар үткәч кенә,

Күңел күп нәрсәгә төшенә.

Бары үз башыннан узганнары

Җирдә сабак була кешегә.

"КУ" 12, 2016

Фото: pixabay