Үксез телем

Татар балалар бакчасындагы кайбер
аналар туган телебезгә каршы
чыкканнан соң туган шигырь

Үксез Тукай хәлендә син:
Сыймадың тар йөрәкләргә...
Телләр бүген берәм-берәм
Әйләнәләр өрәкләргә.
Син дә әллә шул чиратта?
Кем бастырды сине анда?
Нигә һаман татар кими
Адәм затын санаганда?
Сыймадың син мәктәпләргә,
Булдың анда артык кашык.
Син барсына киртә, имеш! –
Ачу, нәфрәт акты ташып...
Якаң тотып очырдылар
Бусагадан урам якка.
Синең телең ярарлык дип
Табыннарга турамакка.
Йолдызларны синең телдә
Ярамый дип өйрәнергә.
Аш бүлмәсе – синең урын,
Сөйләшсеннәр өйдә генә!
Татар телле дәреслекләр
Очты дөрләп янган мичкә...
Иртән «Туган тел» көйләгән
Курай тынып калды кичкә.
Татар телле бакчага да
Сыймадың син, мескен телем.
Утлы ташлар яуды башка –
Җитә калды искәртүем.

Татар үзе, чабуыңнан
Умырып алып, эттәй талый.
Сине уйлап тама яшем,
Әрнүемнән йөрәк каный.
Базар көнне шайтаннарга
Хуҗаң сине сатар алдан.
Йөрәгемне калкан итеп
Яклыйм сине...
Татарлардан!..

«КУ» 02, 2025

Фото: unsplash