Туган телем

Туган телем! Кайнар каным булып,

Тамырларда минем агасың.

Һәм ят телле төрле башкалардан

Аерасың татар баласын.

Чал тарихның тиңсез бүләге син –

Шигъриятең яңгырый ташлардан.

Үлән булып ничә дистә гасыр

Шытасың син шәһит башлардан!..

Үзгәрүчән, тик картаймый торган

Мәңге яшәр гүзәл агач син!

Җирдән, судан кабат бар буласың,

Баш киселеп, илләр аугач син.

Син тауларда кыя ташы булып,

Җир куйнына тамыр сузгансың.

Син, җыр булып, газиз Җиребезнең

Кыйтгаларын кичеп узгансың.

Беркайчан да алмаштырмам сине,

Яңгырап торган башка бер телгә.

Син каныма, мигә, геннарыма

Якты иман итеп кертелгән.

Тамырларга балта чабылса да,

Без – мәңгелек, исән, тере без!

Дистә телдә оста сөйләшсәк тә,

Каныбызда – ана телебез!

"КУ" 11, 2018
Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: