Татарстан хатыннары

Җирнең һәммә асылташы,

көмеше, алтыннары

читтә торсын сез булганда,

Татарстан хатыннары!

Безне куркытмый язмышның

яңгыры, салкыннары

сезнең кочагыгыз барда,

Татарстан хатыннары!

Җирдә күпме сайрар кош бар —

аларның хак моңнары

сезнең пышылдауга тормый,

Татарстан хатыннары!

Сез пешергән ризыклардан

тәмлерәк тәгам бармы?!

Булса да, бик тә сирәктер,

Татарстан хатыннары!

һәммәгез булырга лаек

шагыйрьләр, ханнар яры —

сез акыллы да, назлы да,

Татарстан хатыннары!

Көзнең җимешләре бит сез,

ә кышның ап-ак кары,

яз гөлләре, җәй рәхәте —

Татарстан хатыннары!

Якты көнле, тәмле төнле,

сез — алиһәләр пары!

Яшәгез һәм яшәтегез,

Татарстан хатыннары!

 

фото: elitat.ru

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: