Таң беленде

Таң беленде.

Соңгы йолдыз нуры

Кояш нурларына кушылды…

Күкне ярып торна тавыш бирде,

Сискәнүдән йөрәк кысылды.

Таңны ярып торна тавыш бирде,

Бер ялгызы оча, и бәгырь!

Югалганнар иңрәведер анда,

Югалтканнар аһы – миндәдер...

Бер ялгызы оча... төнне көнгә

Ялгап талган канат очы белән...

...Бүгенгемне киләчәккә ялгар

Җан җепселем зеңли: «Өз-зеләм...»

Аңны ярып торна тавыш бирде,

Соң сәгате әллә очышта?..

Мәңгелекнең утлы тәгәрмәче –

Кояш яна дөрләп, офыкта...

"КУ" 10, 2020

Фото: pixabay