Шундый авыр булып калды сине күрү...

Шундый авыр булып калды сине күрү:

әллә үле инде, әллә тере.

Бүген апрель ноябрьгә охшагандай –

син бөтенләй башка. Үзең түгел.

Сүзем. Сиңа гына дигән мең-мең сүзем

дәшәлмәүдән буа бугазымны. 

Беләм:

минем язгы боздай чатнап

яргалану сиңа берни түгел, буп-буш ыгы-зыгы.

Битлегеңне ватамын да, мин арчалап,

әрчим, әрчим җан кабыгың.

Кубаруга яңа битлек калкып чыга –

юк, танымыйм.

Табылмыйсың...  Инде сиңа ят шәүләләр,

ят мәгънәләр йога.

(Һәм коточкыч!) сине күргән саен

ышанычым җуям. Яратуга.

Тик алай да тыңла, ишет, яме,

белеп булмый алдан дөнья хәлен:

бер көн дертләп уянуга уеныңнан

һәм болытлар куерудан ят офыкта,

йөз чөерсә әгәр бөтен Галәм.

(Сине беркем үз итмәсә. Минем кадәр!)

үз җанымнан чыра телеп,

сине тергезерлек мин бар!

(Мин каядыр бар)

Син онытма... 

 

"КУ" 11, 2021

Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: