Китте халык, сулды-кипте кое...

Кое кануны

Чүлдә – үлән, коеда су типте –

Гәрчә Кояш дөрләп янса да...

Китте халык, сулды-кипте кое,

Су калмады анда тамчы да!

 

Су алмасаң – чишмә кибә...

Без бит гасыр тирәнлекләреннән

Күтәрелгән нәсел ләбаса!

Корып-кибеп юкка чыга чишмә,

Үз ишләрен әгәр тапмаса...

 

Сөю җәмгыятен төзербез!

«Җир – Мәхәббәт планетасы...»

Антуан де Сент-Экзюпери

Мәхәббәттән кача алмабыздыр,

Матурлыкка һәрчак әзер без.

Планеталар бергә туганлашкач,

Сөю җәмгыятен төзербез!

 

Минем корал

Минем шигырь – дүрт көпшәле мылтык.

Оста ата беләм – мәргән күк...

Көпшәләрдән ләкин ядрә түгел,

Сүз коела энҗе-мәрҗән күк!

 

Уйла, каләм!

Сүз әйтердән алда уйла, каләм,

Юлчы юлны сайлаган сыман...

Маңгай бөкмик ялган көзгеләргә, –

Каләмчеләр исә – каһарман.

 

Шигырьләрем – кошларым

Дала сыман ачык шигырьләрем,

Белми дала аран-бикләрне.

Шигырьләрем – азат кошлар сыман, –

Канатлылар белми чикләрне.

 

Кем кулында дөнья?

...Күпләр күтәрелгән таҗ-тәхеткә

Һәм уйлаган: зирәк – ул гына...

Лира һәрчак читтә... Тәхетләрне

Тапшырыйк без Шагыйрь кулына!

 
Әхмәт Саттар
"КУ" 12, 2017
 фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: