Шатлыкларның төсе һәрчак чагу...

Шатлыкларның төсе һәрчак чагу,
Кайгыныкы гына гел кара.
Шатлыклардан елмаюлар туа,
Кайгылардан кала гел яра.
Ак төстәме, яшел, зәңгәрме ул —
Шатлык шатлык инде кайда да.
Алтын-көмешләргә төрелсә дә,
Кара булып кала кайгылар.
Сагыш төсе һәрчак сары инде,
Зәңгәр төстә гелән хыяллар.
Иртәгәсе – алсу, ә үткәннәр
Чуар төскә гелән буялган.
Һәр кешенең шатлык төсе үзгә,
Һәрчак чагу, якты – шул бары.
Тик кайгылар гына бердәй ачы,
Һәркем өчен кайгы гел кара...

"КУ" 02, 2021

Фото: pixabay