Париж
Парижныкы кебек балкып янды Тәрәзәдән Казан утлары.
Хемингуэй саташтырды мине.
Көнне, төнне, таңны бутадым.
Парижныкы кебек балкып янды
Тәрәзәдән Казан утлары.
Һәм сөйләдем сиңа онытылып
Монпарнасны,
Күрсәм, ялгышмам:
Менә бусы – «Шекспир һәм Ко» булыр,
Менә бусы – Нотр-дам-де-Шан.
Медичиның болын-бакчасында,
Шәраб исләреннән исереп,
Шундый гөлләр, шундый гөлләр үсә!..
Мин аларның белмим исемен.
Карарымнан хисләр кабарынды.
Тик монда да, ахры, кичектем:
– Син һәрвакыт йөрәгемдә йөргән
Бәйрәм! – дидем ялгыш,
Ничектер.
– Ияр миңа!
Бездән артып калган
Дөнья, – дидем, – узмас тупсадан!
Качыйк, әйдә!
Качыйк!
Һич югында,
Париж куенына булса да.
Кабаланган,
Өмет тулы караш
Гамьсез елмаюга абынды,
Иренеңне буяп көрсендең син:
– Ә мин диңгез ярын сагындым.
Хемингуэй соңгы битен япты.
Күкне басты шәфәкъ тимгеле.
Һәм чаң какты шәһәр.
Бусы инде
Башка әсәр иде, билгеле...
Чәлпәрәмә килеп төште Париж,
Коткарырга аны казганмам...
Кояш.
Урта диңгез.
Куш күләгә.
Нәрсә әйтим? –
Сәлам Казаннан!
"КУ" 12,2022
Фото: unsplash
Теги: поэзия
Иң мөһим һәм кызыклы язмаларны Татмедиа Telegram-каналындаукыгыз
Комментарии
0
0
Хемингуэй саташтырды мине. Көнне, төнне, таңны бутадым. Парижныкы кебек балкып янды Тәрәзәдән Казан утлары. (“Париж” Рүзәл Мөхәммәтшин)..............................Нинди Париж? СаташкангаБар- Пхеньян, бар-Пекин ...Безнең илдә көнчыгышкаборылды бит маркетинг.................Нигә сиңа Монпарнас та,нигә сиңа Нотр- Дам? Күк храмы, Кымсусанныңкай төше ким алардан....................Мао Цзедун мавзолее Ленинныкы күк, диләр.Андый төрбә- мавзолейларКытайларда күп диләр....................Безнең мәгъриб диварыннанозын Кытай дивары.Кытайныкы- егерме мең,безнең - дүрт мең нибары........................Шулай булгач уянуга син мәшрикъка сәлам әйт.Шунда йокың тыныч булыр һәм үзең дә сәламәт...................Сәйлән (Ләйсән Мөгътәсимова)
0
0