Логотип Казан Утлары
Шигърият

Орлыгың ни...

Әй татарым, орлыгың ни – Тарымы син, бодаймы син?

Әй татарым, орлыгың ни –

Тарымы син, бодаймы син?

Идел-Урал тарласына

Сипкән сине Ходаймы соң?

 

Алып килеп монда сине

Диңгезеңнән, тауларыңнан,

Иген сыман чәчкән сине,

Учлап-учлап тубалыннан.

 

Киң колачтан сипкән сине

Идел-Урал арасына.

Белгән Халикъ хөр рухыңны,

Тар урынга сыймасыңны!

 

Әй татарым, орлыгың ни?

Бик тересең – тарыдыр син!

Корылыкка бирешмәгән

Тары сыман катыдырсың.

 

Әй татарым, арыштыр син –

Сокланалар егәреңә.

Бирешмәгән орлык көче

Меңәр еллык җилгәрүгә.

 

Югалтмыйча орлык аслын,

Меңәр елны кичкән бодай,

Тегермәннән исән чыккан,

Ак-пакь калган – ул син бугай!

 

Он иткәндә таш тәгәрмәч,

Әверелдең калачка син.

Кояшка тиң ипи тотып,

Ил каршына чыккан да син!

 

Әй татарым, орлыгың ни –

Тарымы син, бодаймы син?

Орлыгыңны яшәтергә

Балаларың калырмы соң?

 

"КУ" 09, 2017

Фото: pixabay

Теги: шигырь поэзия

Иң мөһим һәм кызыклы язмаларны Татмедиа Telegram-каналындаукыгыз

Нет комментариев