Нәсел агачы

Нәсел агачы дип тормаганнар,

Җае килсә, балта чапканнар –

Кәүсәсендә тирән җөйләр калган,

Ботакларын утка якканнар.

Янган агач... Башы утта булса,

Ташлар аралаган тамыры.

Бирешмәгән утка-суга гына

Агачларның җирдә калыры.

Язмыш бердер барлык чорларда да:

Агач булса – балта табыла.

Ләкин белә тарих агачларның

Балталарны ваткан чагын да...

Тамырлары кысып кочаклаган,

Җибәрмәскә тоткан, уралып, –

Чорлардан син йолкып ташлап кара,

Гасырлардан кара кубарып!

Шул агачтан бит без...

Бурыч уртак –

Җирдә ничек яшәп китсәң дә.

Яфрак булып ярыл киләчәккә,

Тамыр булып тарал үткәнгә...

 

"КУ" 8, 2019

Фото: pixabay

Теги: поэзия

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: