Логотип Казан Утлары
Шигърият

Мин соң кемгә эндәшим?

Нигә без һаман хокуксыз?

Нигә без һаман хокуксыз,

Нигә без һаман да ким?

Тукай Гаязга эндәшкән,

Мин соң кемгә эндәшим.

Ркаил Зәйдулла

(дусларча шаяру)

Шигърияттә битараф юк,

Һәрбер шагыйрь көндәшең.

Син биектә – күктә бүген,

Син җиһанга эндәштең.

Эндәштең – күкләр күкрәде,

Җиһан койды күз яшен.

Син чорлар белән сөйләштең,

Һәрбер сүзең – ут, яшен.

Барлап чыктың бөекләрне,

Табалмадың тиңдәшең...

Син тарихка, син халыкка,

Син милләткә эндәштең.

Тукай Гаязга эндәшкән,

Син шигырьгә эндәштең.

Шигырь – синең татлы төшең,

Шигырь – ачы күз яшең.

 

"КУ" 9 (сентябрь), 2016

Фото: pixabay

Иң мөһим һәм кызыклы язмаларны Татмедиа Telegram-каналындаукыгыз

Нет комментариев