Мин

Мин.

Синең яныңда.

Яшәргә өйрәнәм.

Мәңгелек узыштан тукталып.

Бар нәрсә – шәмәхә. Чукынсын дөньясы.

Йөрәкне тыңлыймын таң калып.

Биш йозак артына бикләнгән йөрәкнең

Оныткан идем лә барлыгын.

Күкрәтер-тетрәтер давыллар көткәндә

Уятты... гап-гади тынлыгың.

Мин күпме йокладым? Айлармы, еллармы?

(Вакытның исәбе җуелган.)

Чаң булып кагылды исерткеч тынлыгың

Һәм тартып чыгарды чоңгылдан.

Планета ачкан күк йөрәгем тыңлыймын,

Таң калып, ишеткән сүзләрдән:

«Рөхсәт бир, бу гамьсез дөньяны җылытыйм!

Минме соң ярата белмәгән?!»

Мин. Синең яныңда. Яшәргә өйрәнәм... 

Гөлнара  Сабирова 

"КУ" 06, 2022

Фото: unsplash