Көзге

Син көзгегә кара, и туганым,
Чагылышың өйрән – аллы-артлы,
Һәм табарга тырыш хакыйкатьне –
Көзге чалыш, әллә дөнья шартлы!
Укып кара, өсне аска куеп,
Уңны сулга куеп укып кара! –
Башмагыңның башын бормасаң да
Уңы сулдан, сулы уңнан бара.
Син көзгегә кара, и туганым,
Чагылышың өйрән – аллы-артлы:
Һәм белерсең, безнең бу дөньяда
Барысы да бер көнлек һәм шартлы!

«КУ» 08, 2024

Фото: unsplash