Китәсе килми

Китәселәр килми әле,
Чөнки яшәп туелмады.
Бу дөньяның рәхәтлеге
Минутлык та тоелмады.
Китәселәр ничек килсен? –
Оныкларны күрәсем бар.
Җәен чәчәкле болында
Такыялар үрәсем бар.
Китәргә иртәрәк әле,
Күпме җирләр йөрисем бар.
Башларымнан үткәннәрне
Яшь буынга сөйлисем бар.
Китәрләргә кая әле...
Тәмамлыйсы эшләрем бар.
Бергәләшеп гомер сөргән
Чордашлар, дус-ишләрем бар.

"КУ" 02, 2021

Фото: pixabay