Хәерле төн

…Айны болыт йотты. Төн күзендә

Җемелдәшә көзге яфраклар;

Сунарга да чыгар вакыт җитте:

Хәерле төн телим шагыйрьләргә!

Хәерсезе сезгә, караклар!

 

Шагыйрьләр дә, караклар да, әйе,

Икесе дә бер үк нәселдән;

Кичер, Ходам! Мин дә бур һөнәрен

Үзләштердем үсмер яшемнән.

 

Юк, алмыймын гөнаһ үз өстемә:

Өелеп ятмагае! – Чит-ятның

Кечтек энәсенә тимәдем;

Мәгәр, кеше күрмәгәндә, күктән

Алтын сүзләр урлыйм төннәрен.

 

Чуар төскә кергән язмышларның

Чуалчыклы җебен сүтә-сүтә,

Саплыймын да каләм кашына,

Җан җылыткыч шигъри кием тегәм

Җирдә яшәгәннең барсына.

 

Бу тәңгәлдә мин ялгызак түгел,

Чал табигать – тиңсез көндәшче:

«Һәрбер күзәнәгем – тере шигырь,

Син шымып тор, шагыйрь!» – димәкче. 

 

Һич белдермим үпкә табигатькә,

Игезәк ич изге шөгыльләр;

Шуңа да мин ихлас теләк юллыйм:

Хәерле төн сезгә, кешеләрем!

Хәерле төн, хаклы шагыйрьләр!

 

"КУ" 07, 2017

Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: