Күңел – тургай

Дөнья куган иҗтиһадның

Түгел лә, ярсу иҗатның –

Корбаны булдым бугай.

Төрле хисләр дулкынында

Тирбәлгән күңел – тургай

Сайрый-сайрый биеклектән

Төбәлә туган җиргә.

Тамырларым тарткан чакта

Әверелмәм мөһаҗиргә...

Тәэсирләнеп әсирләнәм,

Әсәрләнәм көн саен.

Үземне үзем кайгырту

Мәшәкате, мөгаен,

Борчымый мине...

Йомылмас

Әллә яралы моңмын?!.

Саркылган канны туктатып,

Җилемләргә дә соңмы?..

...Кемнәргә хезмәт иттем соң?

Атлыйммы дөрес юлдан?

Сүзләр энҗесе эзләдем

Сагаймый саргаюдан.

Уйлый күрмәгез, акланмыйм...

Ни кылыйм?

 Пешмәгәнмен.

Күкләрне гизгән хыялда

Калганмын...

 Төшмәгәнмен...

 

"КУ" 2, 2020

Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: