Калдыр мине язда

Гомер кышы озак тоелса да,

Алда әле кыска язлар бардыр.

Күңелемдә гөлләр бөреләнә...

Калдыр мине шул язымда, калдыр!

«Язлар кирәк түгел инде, дисең,

Мине гомер кышларымда калдыр». –

Гомерләрнең көзе узып киткәч,

Кышның да үз матурлыгы бардыр...

Бу дөньяда кышлардан соң язны

Көтеп яшәүчеләр тагын бардыр...

Беребез – кышта, беребез язда булыйк,

Калдыр мине язда, зинһар, калдыр!..
 

"КУ" 12, 2023

Фото: unsplash