Җилләр исәр...

Җилләр исәр – илләр кичәр,

Куагында яфрак кибәр.

Сагышларың – яфракларда,

Җилләр килеп юлга сибәр.

Җанны изәр үкенечләр,

Хәтереңә ниләр төшәр?

Күз алдында үксез чагың,

Кем кул селтәр: «Әйдә, үсәр...»

Җилләр исәр, җилләр әйтер:

«Әрнүеңне, улым, яшер!

Кыл өстеннән үтәсең бар,

Фәрештәләр бер эндәшер...»

Еллар үтәр, алда – юллар,

Агымсуда язгы сулар...

Үксезлекнең әрнүләрен

Язлар юар, сулар юар.

"КУ" 8, 2018

Фото: pixabay