Истанбулда җәйнең соңгы мизгелләре...

***
Истанбулда җәйнең соңгы мизгелләре...
Күңел котылгысыз көзне сизми әле.
Мәчет алларында гөрли күгәрченнәр,
Учлар әле тулы, хисләр әле җүләр!..
Хәрам фонтанында тәңкә-тәңкә теләк.
Үлем көчсез монда, яшәү – өметлерәк!
Күзләремне йомып бактым Үскүдарга.
Куллар рәхәт изри, алар сөеп арган...
...Истанбулда җәйнең соңгы мизгелләре.
Күңел котылгысыз көзне сизми әле.

"КУ" 07, 2024

Фото: unsplash