Җигүле ат

Җигүле ат җигелгән,

Дугасыннан күмелгән.

Олау йөген тартып бара,

Башы аска иелгән.

Авызлыгын чәйнәп аткан! –

Башын кыскан йөгәне.

Берәрсенең мондый тормыш

Бармы икән күргәне?

Сыртын каты камчы изгән,

Эче эчкә ябышкан.

Усал һәм кырыс хуҗасы

Сөенеп кайта табыштан.

Ашатмый атын, кайткач та

Капкага бәйләп куя.

И бәхетсез җан иясе! –

Моңаеп кешнәп куя.

"КУ" 07, 2019

Фото: pixabay