Хыял булып яшәр ярыма

Итәкләрең җилдә җилфердидер,

Болыннарда шәүләң чагыла.

Тугайлардан йөгереп киләсеңдер

Яшьлекнең иң ямьле чагына.

Көлүең – чулпы чыңы, йөрешләрең

Аккош көнләшерлек иде лә.

Кояш сыман сары күлмәгеңнең

Кагыласы иде җиңеңә.

Сылу идең, зифа буйлы идең,

Һәр авазың челтер чишмәдәй.

Офыкларга гына кереп киттең,

Су алырга гына төшкәндәй.

Тузганаклар арасында калдым,

Шул сурәтне салып җаныма.

Бу җырымны сиңа бүләк итәм –

Хыял булып яшәр ярыма.

 

"КУ" 06, 2018

Фото: pixabay
Теги: поэзия

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: